ചിക്കന്‍ ഫ്രൈഡ് റൈസ്‌

I. ചേരുവകൾ 

• ചിക്കന്‍ പീസ് ആക്കിയത് - 300 ഗ്രാം (ബോണ്‍ലെസ്സ് ചിക്കന്‍ ആണ് വേണ്ടത് ..അത് ഇത്തിരി നീളത്തില്‍ മുറിച്ചത്)
• സോയ സോസ് - 2 ടേബിള്‍ സ്പൂണ്‍
• കോണ്‍ ഫ്‌ലോര്‍ - 3 സ്പൂണ്‍
• കുരുമുളക് പൊടി - ആവശ്യത്തിനു
• ഉപ്പു - ആവശ്യത്തിനു

ഇത്രേം ചേരുവകൾ ചിക്കനില്‍ പുരട്ടി 20 മിനിറ്റ് വെക്കുക. അതിനു ശേഷം ഇത്തിരി ഓയില്‍ ഒഴിച് ഫ്രൈ ചെയ്തു മാറ്റി വെക്കുക .

II. ചേരുവകൾ 

• ബസ്മതി റൈസ് - 2 കപ്പ് 
• ചെറുതായി കട്ട് ചെയ്ത പച്ചക്കറി - കാരറ്റ് ,കാബജ്, കാപ്‌സികം ,ബീന്‍സ്, സ്പ്രിംഗ് ഒനിയന്‍ ഓരോ കപ്പ് വീതം.
• സവോള അരിഞ്ഞത് - 1 വലുത്
• വെളുത്തുള്ളി കൊത്തി അരിഞ്ഞത് - ഒന്നര സ്പൂണ്‍
• സോയ സോസ് - 2 ടേബിള്‍ സ്പൂണ്‍
• വിനാഗിരി - 1 ടേബിള്‍ സ്പൂണ്‍
• വെള്ള കുരുമുളക് പൊടി - (ആവശ്യത്തിനു)
• മുട്ട - 2 ( ഉപ്പ് ചേര്‍ത്ത് ചിക്കി പൊരിച്ചു വെക്കണം)

നന്നായി വാഷ് ചെയ്ത 2 കപ്പ് ബസ്മതി റൈസ് അര മണിക്കൂര്‍ വെള്ളത്തില്‍ കുതിര്‍ക്കുക. അതിനു ശേഷം വേവിച് അധികം വെന്തു പോകാതെ വാര്‍ത്തെടുക്കുക. എന്നിട്ട് തണുക്കാന്‍ വെക്കുക.

ഫ്രൈഡ് റൈസ് ഉണ്ടാക്കുന്നതിനു മുന്‍പേ എല്ലാ ചേരുവകളും അടുത്ത് റെഡി ആക്കി വെക്കണം. പിന്നെ നല്ല ഹൈ ഹീറ്റില്‍ സ്പീഡില്‍ വേണം മിക്‌സ് ചെയ്യാന്‍.

പാചകം ചെയ്യുന്ന വിധം

പാനില്‍ 2 സ്പൂണ്‍ സൺഫ്ലവർ  ഓയില്‍ ഒഴിച് വെളുത്തുള്ളി വഴറ്റിയ ശേഷം സവോള , പച്ചക്കറി, പകുതി സ്പ്രിംഗ് ഒനിയൻ ചേര്‍ത്തു ഒന്ന് വഴറ്റുക. ഒന്നും വെന്തു പോകരുത്. അതിനു ശേഷം സോയ സോസ , റൈസ്, മുട്ട, ചിക്കന്‍, കുരുമുളക് പൊടി, വിനാഗിരി എല്ലാം ചേര്‍ത്ത് പെട്ടന്ന് മിക്‌സ് ചെയ്ത് എടുക്കുക. തീ ഓഫ് ചെയ്യുക. ലാസ്റ്റ് ബാക്കിയുള്ള സ്പ്രിംഗ് ഒനിയന്‍ കൂടി ചേര്‍ക്കാം. 

[Read More...]

ചിക്കന്‍ റോസ്റ്റ് (iii)

ചേരുവകള്‍

• ചിക്കന്‍ – 500 ഗ്രാം
• സവാള – അഞ്ച് എണ്ണം
• പച്ചമുളക് – നാല് എണ്ണം
• ഇഞ്ചി – സാമാന്യം വലിയ കഷ്ണം
• വെളുത്തുള്ളി – ഒന്നര ടീസ്പൂണ്‍
• തക്കാളി – ഒന്നു വലുത്
• ചെറുനാരങ്ങാനീര് – ഒരു ടീസ്പൂണ്‍
• കറിവേപ്പില – രണ്ട് തണ്ട്
• കറുവപ്പട്ട– ഒരു കഷണം
• ഗ്രാംപൂ – മൂന്ന് എണ്ണം
• പെരുംജീരകം– രണ്ട് നുള്ള്
• കുരുമുളക് – അര ടീസ്പൂണ്‍
• ഏലക്ക – മൂന്ന് എണ്ണം
• മഞ്ഞള്‍പ്പൊടി – കാല്‍ ടീസ്പൂണ്‍
• മുളകുപൊടി – ഒന്നര ടീസ്പൂണ്‍
• കുരുമുളകുപൊടി – അര ടീസ്പൂണ്‍
• മല്ലിപ്പൊടി – രണ്ട് ടീസ്പൂണ്‍
• ചിക്കന്‍ മസാല – ഒരു ടീസ്പൂണ്‍
• തേങ്ങാക്കൊത്ത്– നാലു ടീസ്പൂണ്‍
• ഉപ്പ്, എണ്ണ – പാകത്തിന് 

തയാറാക്കുന്ന വിധം:

ചിക്കന്‍ കഷണങ്ങള്‍ അല്പം മഞള്‍പ്പൊടി, മുളകുപൊടി, മല്ലിപ്പൊടി, ഉപ്പ്, നാരങ്ങാനീര് ഇവ പേസ്റ്റ് ആക്കി മാരിനെറ്റ് ചെയ്തു ഫ്രിഡ്ജില്‍ വയ്ക്കുക. പാനില്‍ എണ്ണ ചൂടാക്കി കറുവപ്പട്ട, ഗ്രാംപൂ, കുരുമുളക്, പെരുംജീരകം, ഏലക്ക ഇവ ചേര്‍ത്തു മൂപ്പിക്കുക. ചേരുവകള്‍ ചതച്ചെടുത്താല്‍ കൂടുതല്‍ നന്നാകും. മസാല മൂത്തുകഴിഞ്ഞു സവാള നീളത്തില്‍ അരിഞ്ഞത് ഇതിലേക്കു ചേര്‍ത്തു വഴറ്റുക.
നിറം മാറി വരുമ്പോള്‍ പച്ചമുളക്, ഇഞ്ചി, വെളുത്തുള്ളി, കറിവേപ്പില ഇവയും കൂടി ചേര്‍ക്കണം. ശേഷം, തക്കാളി അരിഞ്ഞത് തേങ്ങാക്കൊത്ത്, മഞ്ഞള്‍പ്പൊടി, മുളകുപൊടി, മല്ലിപ്പൊടി, ചിക്കന്‍ മസാല ഇവ ചേര്‍ത്തു ഇളക്കി യോജിപ്പിക്കുക. പച്ചമണം മാറി വരുമ്പോള്‍ ചിക്കന്‍ കഷണങ്ങളും പാകത്തിനു ഉപ്പും ബാക്കി നാരങ്ങാനീരും ചേര്‍ത്തു നന്നായി ഇളക്കി യോജിപ്പിച്ച് വളരെ കുറച്ചു വെള്ളവും ചേര്‍ത്ത് അടച്ചുവച്ച് വേവിക്കുക. ചിക്കനിലെ വെള്ളം ഇറങ്ങി വറ്റിവരുമ്പോള്‍, മസാല ചിക്കന്‍ കഷണളില്‍ നന്നായി പിടിച്ചിരിക്കുന്ന പരുവം ആകുമ്പോള്‍ തീ അണയ്ക്കുക. മറ്റൊരു പാനില്‍ എണ്ണ ചൂടാക്കി ഒരു സവാള കനം കുറച്ച് അരിഞ്ഞത് വറുത്തെടുക്കണം. ഇത് തയാറാക്കിയിരിക്കുന്ന ചിക്കനു മേല്‍ വിതറി ഉപയോഗിക്കാം. ആവശ്യമെങ്കില്‍ മല്ലിയില കൂടി തൂകാവുന്നതാണ്.

[Read More...]

താറാവ് റോസ്റ്റ് (ii)

ചേരുവകള്‍

• താറാവ്    ഒന്ന് 
• ചുവന്നുള്ളി    50 ഗ്രാം
• ഇഞ്ചി    രണ്ട് കഷ്ണം
• വെളുത്തുള്ളി    ഒരു തുടം
• മഞ്ഞള്‍പൊടി    ഒരു ടീസ്പൂണ്‍
• മസാലപ്പൊടി    രണ്ട് ടീസ്പൂണ്‍
• മുളകുപൊടി    രണ്ട് ടേ.സ്പൂണ്‍
• കുരുമുളകുപൊടി    ഒരു ടീസ്പൂണ്‍
• കറിവേപ്പില    ഒരു തണ്ട്
• സവാള, പച്ചമുളക്    രണ്ടെണ്ണം വീതം
• കറിവേപ്പില    ഒരു തണ്ട്
• ഉരുളക്കിഴങ്ങ് (വട്ടത്തില്‍ അരിഞ്ഞത്) ഒരെണ്ണം

തയ്യാറാക്കുന്ന വിധം

വലിയ കഷ്ണങ്ങളാക്കിയ താറാവിറച്ചിയില്‍ ചുവന്നുള്ളി, പകുതി ഇഞ്ചി, വെളുത്തുള്ളി, മഞ്ഞള്‍പൊടി, മസാലപ്പൊടി, പകുതി മുളകുപൊടി, കുരുമുളകുപൊടി, ഉപ്പ്, കറിവേപ്പില എന്നിവ യോജിപ്പിച്ച് ആവശ്യത്തിന് വെള്ളം ചേര്‍ത്ത് മുക്കാല്‍ വേവില്‍ വേവിക്കുക. താറാവിന്റെ നെയ്യ് ഊറ്റിയെടുത്ത് അതില്‍ താറാവ് കഷ്ണങ്ങള്‍ വറുക്കുക. 

ബാക്കിയുള്ള നെയ്യില്‍ ഉരുളക്കിഴങ്ങ് വറുക്കുക. അതില്‍ തന്നെ നീളത്തിലരിഞ്ഞ സവാള, ഇഞ്ചി, വെളുത്തുള്ളി, പച്ചമുളക്, കറിവേപ്പില എന്നിവ വഴറ്റുക. ശേഷം  മുളകുപൊടിയും മല്ലിപ്പൊടിയും കുരുമുളകുപൊടിയും കറുവാപ്പട്ട, ഗ്രാമ്പൂ എന്നിവ പൊടിച്ചതും ചേര്‍ക്കുക. 

ഇതില്‍ ഇറച്ചിയുടെ ഗ്രേവി ഒഴിക്കുക. തിളയ്ക്കുമ്പോള്‍ വറുത്ത കഷ്ണങ്ങള്‍ ചേര്‍ത്ത് ചെറുതീയില്‍ മൂടിവെച്ച് വേവിക്കുക. ഗ്രേവി അല്‍പം കുറുകുമ്പോള്‍ അടുപ്പില്‍നിന്ന് വാങ്ങാം. വറുത്ത ഉരുളക്കിഴങ്ങ് കഷ്ണങ്ങളിട്ട് അലങ്കരിക്കുക.

[Read More...]

വറുത്തരച്ച കോഴിക്കറി

ചേരുവകള്‍

• കോഴിയിറച്ചി (കഷണങ്ങളാക്കിയത്)– ഒരു കിലോ
• തേങ്ങ ചിരവിയത് – രണ്ട് കപ്പ്
• തക്കാളി– രണ്ട് എണ്ണം
• പച്ചമുളക്– നാല് എണ്ണം
• മഞ്ഞള്‍പൊടി– മുക്കാല്‍ ടീസ്പൂണ്‍
• മല്ലിപ്പൊടി– നാല് ടേബിള്‍സ്പൂണ്‍
• മുളകുപൊടി – നാല് ടേബിള്‍സ്പൂണ്‍
• ഇഞ്ചി– സാമാന്യം വലിയ കഷണം
• വെളുത്തുള്ളി– എട്ട് അല്ലി
• ചെറിയ ഉള്ളി– അഞ്ച് എണ്ണം
• എണ്ണ– മൂന്നര ടേബിള്‍സ്പൂണ്‍
• കറിവേപ്പില– മൂന്ന് തണ്ട്
• കടുക് – ഒരു ടീസ്പൂണ്‍
• ഉപ്പ്– ആവശ്യത്തിന്.   

തയാറാക്കുന്ന വിധം

കോഴിയിറച്ചി കഷണങ്ങളാക്കിയതു നന്നായി കഴുകി വെള്ളം വാര്‍ത്തുവയ്ക്കുക. പച്ചമുളക്, വെളുത്തുള്ളി, ഇഞ്ചി, ചെറിയ ഉള്ളി, തക്കാളി എന്നിവ ചെറുതായി അരിയുക. ചിരവിയ തേങ്ങ മിക്‌സിയിലിട്ട് ചെറുതായി ഒതുക്കുക (വെള്ളം ചേര്‍ക്കാതെ). നോണ്‍സ്റ്റിക് പാനില്‍ അര ടേബിള്‍ സ്പൂണ്‍ എണ്ണ ഒഴിച്ച് മിക്‌സിയില്‍ ഒതുക്കിയെടുത്ത തേങ്ങയും അഞ്ച് ചെറിയ ഉള്ളിയും ഒരു ഇതള്‍ കറിവേപ്പിലയും ചേര്‍ത്ത് വറുക്കുക. ഗോള്‍ഡന്‍ ബ്രൗണ്‍ നിറമാകുന്നതുവരെ വറുക്കേണ്ടതാണ്. 

ചൂടാറുമ്പോള്‍, വെള്ളം തളിച്ച് മിക്‌സിയില്‍ നന്നായി അരച്ചെടുക്കുക. ചട്ടിയില്‍ ഒരു ടേബിള്‍ സ്പൂണ്‍ എണ്ണ ഒഴിച്ച് ഇഞ്ചി, പച്ചമുളക്, വെളുത്തുള്ളി, കറിവേപ്പില (ഒരു ഇതള്‍), ചെറിയ ഉള്ളി എന്നിവ വഴറ്റുക. ഇതിലേക്ക് മല്ലിപ്പൊടി, മുളകുപൊടി, മഞ്ഞള്‍പ്പൊടി എന്നിവയും ചേര്‍ത്ത് ഇളക്കുക. 

ഒരു മിനിറ്റ് കഴിയുമ്പോള്‍ തക്കാളി ചേര്‍ത്ത് അല്‍പനേരം ഇളക്കുക. അതിനുശേഷം വൃത്തിയാക്കിവച്ച കോഴിയിറച്ചിയും ആവശ്യത്തിന് ഉപ്പും ചേര്‍ക്കുക. നാല്–അഞ്ച് മിനിറ്റ് ഇളക്കുക. ചട്ടി അടച്ചുവച്ച് ചെറുതീയില്‍ വേവിക്കുക. വെന്തു കഴിയുമ്പോള്‍ വറുത്തരച്ച തേങ്ങ വെള്ളത്തില്‍ കലക്കിച്ചേര്‍ക്കുക. തിളയ്ക്കുമ്പോള്‍ തീയണച്ച് കടുക് പൊട്ടിച്ച് കറിവേപ്പിലയും ഉള്ളിയും മൂപ്പിച്ചു ചേര്‍ക്കാം.

[Read More...]

പെസഹാ അപ്പം II

ചേരുവകൾ

• അരിപ്പൊടി: 2 കപ്പ് (വറുത്തത്)
• തേങ്ങ ചിരകിയത് : ഒന്നേകാൽ കപ്പ് 
• ഉഴുന്ന് : ഒരു പിടി (വെള്ളത്തിൽ കുതിർക്കണം)
• ചുവന്നുള്ളി : 5-6
• വെളുത്തുള്ളി - 2 അല്ലി 
• ജീരകം - കാൽ സ്പൂൺ
• ഉപ്പ് - ആവശ്യത്തിന് 
• വെള്ളം - ആവശ്യത്തിന് 

തയ്യാറാക്കുന്ന വിധം 

ആദ്യം തന്നെ വെള്ളത്തിൽ കുതിർത്ത ഉഴുന്ന് ആവശ്യത്തിന് വെള്ളം ചേർത്ത് നന്നായി അരച്ചെടുക്കുക്കണം. ഇതിന് പുറമേ ചിരകിയ തേങ്ങയും ജീരകവും പരുക്കനായി വേറെ തന്നെ അരച്ചെടുക്കണം. ചുവന്നുള്ളിയും വെളുത്തുള്ളിയും ഇതുപോലെ വേറെത്തന്നെ അരച്ച് കുഴമ്പുരൂപത്തിലാക്കണം. പിന്നീട് ഒരു വലിയ പാത്രത്തിൽ അരിപ്പൊടിയെടുത്ത് ഇതിലേക്ക് അരച്ച് വച്ച ഉഴുന്നും തേങ്ങയും ചുവന്നുള്ളി- വെളുത്തുളളി പേസ്റ്റും ആവശ്യത്തിന് വെള്ളവും ചേർത്ത് നല്ല കുഴമ്പു പരുവത്തിൽ ആക്കുക. മൂന്ന് മണിക്കൂറിന് ശേഷം അപ്പച്ചെമ്പിന്റെ തട്ടിൽ നിരത്തിയ വാഴയിലയിലേക്ക് ഈ മാവ് കോരിയൊഴിക്കുക. ഇതിന്റെ മുകളിലായി കുരുത്തോല കൊണ്ട് കുരിശ് ഉണ്ടാക്കി വക്കാം. ഇത് പതിനഞ്ച് മിനിട്ട് ആവിയിൽ വേവിച്ചെടുക്കുക. പെസഹാ അപ്പം തയ്യാർ.

[Read More...]

പെസഹാ അപ്പം / ഓവി അപ്പം

(പെസഹാ അപ്പം, പെസഹാ പാല്‍ എന്നിവ തയ്യാറാക്കുന്ന വിധം.)

പെസഹാ അപ്പം ഉണ്ടാക്കുന്ന വിധം

ചേരുവകള്‍

• പച്ചരിപൊടി വറുത്തത് 1 കിലോ
• ഉഴുന്ന് കാല്‍ കിലൊ
• തേങ്ങ ഒന്നര മുറി
• ജീരകം പാകത്തിന്
• ഉള്ളി ആവശ്യത്തിന്
• ഉപ്പ് പാകത്തിന്
• വെളുത്തുള്ളി പാകത്തിന്

പാചകം ചെയ്യുന്ന വിധം.

തേങ്ങ, ഉള്ളി, ജീരകം എന്നിവ ഒന്നിച്ച് നന്നായി അരയ്ക്കുക, ഉഴുന്ന് വേറേ അരയ്ക്കുക. വറുത്ത അരിപൊടിയില്‍ അരച്ച ഉഴുന്നും, തേങ്ങയും, പാകത്തിന് ഉപ്പും ചേര്‍ത്ത് കൊഴയ്ക്കുക. പാത്രത്തില്‍ നിന്ന് അപ്പം വിട്ടുപോരാനായി ഇല, അതുപോലുള്ളവ അടിയില്‍ വച്ച് കൊഴച്ചുവച്ചിരിക്കുന്ന മിശ്രിതം പാത്രത്തില്‍ ഒഴിക്കുക. അപ്പച്ചെമ്പില്‍ പാകത്തിന് വെള്ളം ഒഴിച്ച് തട്ടിനുമുകളില്‍ പാത്രം വെച്ച് വേവിക്കുക.

പൊസഹാ പാല്‍ ഉണ്ടാക്കുന്ന വിധം.

ചേരുവകള്‍.

• ശര്‍ക്കര അരകിലോ
• തേങ്ങ 2 എണ്ണം
• ജീരകം ആവശ്യത്തിന്
• ഏലക്ക ആവശ്യത്തിന്
• എള്ള് ആവശ്യത്തിന്

പാകം ചെയ്യുന്ന വിധം.

പുത്തന്‍ പാത്രത്തില്‍ തേങ്ങാ ചിരണ്ടിപിഴിഞ്ഞ പാല്‍ എടുത്ത് ശര്‍ക്കര ചെറിയ കഷണങ്ങളാക്കിയിടുക, എള്ള്, ജീരകം, ഏലക്ക പൊടിച്ചത് എന്നിവയും ചേര്‍ത്ത് അടുപ്പില്‍ വച്ച് പുത്തന്‍തവികൊണ്ട് ഇളക്കിക്കൊണ്ടിരിക്കുക. പാല്‍ തിളപ്പിച്ച് വാങ്ങുക...

[Read More...]